Europiani i peshëngritjes ka sjellë medaljen e parë të artë për Shqipërinë me provën fantastike të Daniel Godellit që u shpall kampion kontinental në turneun që po zhvillohet në Split.

Sportisti kuqezi arriti të fitojë konkurrencën me shqiptarin tjetër të pedanës Erkand Qerimaj, duke u ngjitur në shkallën më të lartë të podiumit në shkëputje, ndërsa shkodrani u kënaq me medaljen e argjendtë në shtytje, në një disiplinë ku Godelli doli i gjashti.

Askush nuk e priste në arenën e Splitit që pas dy tentativave të dështuara me 156 dhe 158 kilogramë, Godelli të ngrinte në provën e tretë peshën 161 kg. Gëzimi i ligjshëm i protagonistit kuqezi gjeti jehonë dhe mes tifozëve në Split, shkruan TCH.

Daniel Godelli u pezullua me dy vjet pas botërorit të Kazakistanit në vitin 2014 për shkak se rezultoi pozitiv me doping. Ai kishte gjurmë të substancës stanozolol në testet e anti-dopingut dhe kjo i kushtoi shumë. Qerimaj pati gjithashtu një provë force fantastike pasi u shpall nënkampion Europe në shtytje dhe mori medalje bronzi ën dygarësh.

Ndërkohë Romela Begaj, e cila në Split regjistroi aktivitetin e parë pas pezullimit për të njëjtin shkak, e mbyll pa medalje garimin në Europianin e Splitit.

Begaj garoi në peshën deri në 69 kilogramë, duke e filluar si pretendente garën në shkëputje por në vendin e katërt në këtë kategori, dhe të gjashtin në shtytje. Të enjten është prova e radhës për një tjetër shqiptar në pedanë, Krenar Shoraj i cili do të garojë në peshën 85 kilogramë.